今期升呢在一次過食三家，唔同美帝玩，一日兩港。但開波之前，先讚讚美帝老麥搞起午時特價，超值套餐由二十蚊起，減料之餘又無「量化寬鬆」，重加送抽獎推廣，雖然本人對美帝充滿偏見，亦要大讚老麥是次行動，希望本土兩大賺巨錢集團應該學習下。
注意：產品內容及定價只供參考，一切以店家公告為準！
菠蘿火腿扒飯，重點的火腿扒OK大塊，OK厚切，味道OK過咸，菠蘿就比較孤寒，整多塊都唔怕啦！重點係，加咩腸仔呀？整兩條疑似火星人，向動畫《機動戰 艦》中的「火星丼」致敬？腸仔同火腿扒差唔多味，加來無謂，收29蚊，想扮豐富，俾大件少少或兩件菠蘿好過啦！個飯質地糊，汁又少，29蚊，飯都煮唔好， 點做嘢？飯底雷度有70%+，完全唔掂！
反而杯熱蔘蜜就好OK，花旗蔘唔算多，但有香味，蜜糖唔會太甜，有幽香，應該唔係極CHEAP嘢，飲落感覺良好，飲完潤潤地，值得一試。不過，都係順唔番碟雷飯的氣。
之後我地睇廣告，挑戰大加落新出品的「明爐上湯牛坑腩」，晚市特式，四十五元，跟飯有湯有茶，重會開爐，比起之前個谷久氣菠蘿火腿扒飯，定價感覺好合理，睇相似係香港名食清湯腩山寨版，實物相信都係。
個湯係例牌大加落中式盅湯，料足(足到有兩隻雞腳...)，味醇，OK。茶例牌茶包中國茶，無咩質素可言。重點的上湯牛坑腩，個湯好清，唔係幾覺佢係上湯，肉都算唔少，加上腐竹同蘿白，有交代。
個爐勁保溫，保到過熱，保溫唔使咁大火呀？咁熱點食呀？那些號稱牛坑腩，牛味的確濃，質感新鮮，有部份清湯腩專門店水準，真的不俗！湯略咸但夠肉味，蘿白甜 得有點詭異，不自然，整個餐來講，仍算合格。如果鐘意食清湯腩，哩個餐都頂到下癮，當然唔可以寄以太厚期望，山寨始終係山寨，大集團始終都係大集團....
最後出場，係好耐唔見影既「無事包」，今期推介「皇牌特級漢堡」，記唔得記價，記憶中售價約二十五元(70%確定)，剩包，跟汽水或改餐要加錢，當日好似食咗四十幾蚊。
日元高企，但薯條水準無下降，在各大快餐漢堡集團中，最靠得住，比老麥同包王出色太多。個包係平時漢堡的略為強化版，晒士略大，大大改善食肉獸佩無事包食 「完好似無食」的慘況，當天七分餓，吃完竟神奇地夠飽。味道良好，肉味濃，質地軟，肉汁多，蕃茄大塊，芝味唔算濃，但整體搭配起來王道而濃郁，味道出色！
更多快餐冒險，請參閱主博「暗黑熱血」：快餐冒險@暗黑熱血。
沒有留言:
張貼留言