快餐冒險(秋風特急號) ─ 低價蛇羹，冷菜飯汁

咁快又快餐冒險？無計，尾森集團勁有誠意，搞個蛇羹餐，秋風起，賣蛇應市唔奇，奇就奇在，打破三大土炮集團「山寨貴過正版」的惡習，以低價推出，晚市疑似 最低工資「二十八蚊」有蛇羹又有臘味飯，重有熱茶，係美帝狂印銀紙，本地又搞最低工資的大環境下，唔理佢出咩貨，哩個價已經夠晒良心，所以，本家決定第一 時間出擊，以作鼓勵！

 
個餐名，好溫馨，叫「暖心鍋蛇羹晚餐」，就佢個定價來講，我唔反對。入飛唔會等好耐，話咁快有得食。內容係威食勢，有個雙腸飯，上有菜，有小碟脆脆，重有盤唔大唔細既蛇羹同例牌茶包茶，樣就幾有交代。

茶，可以唔講，好難出事，我要強調，水係熱，點解強調水係熱？因為條菜係凍，注意，唔係唔熱，係凍！暖咩心鍋？鍋佢雞心就有份！雙腸份量偏少，每塊塊都好好刀工，激薄，味道不過不失，配豉油飯，OK易食完，但冇咩質素可言。

蛇羹，好微妙，味道似溝淡一半的蛇羹鋪出品，肉料偏少，味道還好，但質感唔似羹。比上兩個星期去食平價自助餐任飲的蛇羹，重要稀，加少少脆脆，只求食飽都OK。

成個餐來講，食完唔會太暖心鍋，除左條菜亦唔會太鍋雞心，廿八蚊哩個時勢，老麥都食唔到，尾森又飯又羹又茶，叫做俾面，質素的不足，用價錢去補救！雖然等價交換唔係土炮快餐集團真理，但「俾得多未必好食，俾得少多數中招」，還是一條通用性很高的法則。

講完，收隊。

原文2010年11月16日首發於主博客：暗黑熱血
http://shadowzo.mysinablog.com/index.php?op=ViewArticle&articleId=2707895