注意：產品內容及定價只供參考，一切以店家公告為準！
繼上次係微博和FB發佈過遇上自稱「超正」的馬蹄露之後，今日遇上一個更威猛的，原來，「超正」已經係好保守，今次在荃灣區遇上的，叫「無敵」，咦？咁港漫既？將來可能會出「獨孤求敗」、「超凡入聖」之類之類的威猛外號。
「明師傅甜品」都算係荃灣區名甜品店，全店甜品大多都係廿零三十蚊，地方裝修是街坊糖水鋪格調，但甜品花款眾多，由傳統糖水到新派水果甜品都有。
能引我入局(笑)，無唔無敵，不是重點，重點是西瓜盅，自幼已經對西瓜盅有無比怨念，小時間飲茶，如果看到西瓜盅，都會頑強爭取，隨著時代進步，大家改吃芒果西米撈之類，大大隻西瓜盅買少見少，想食又懶整，久旱逢甘露，都只係三十四蚊，殺入去，戰吧！
「無敵西瓜盅」，特點係西瓜汁分開上，份量剛好夠我一人獨享，正！盅上的雪糕，係敗筆，雖然我明白，收得三十四蚊，整多球雪糕增下值係良心之舉，正如生意唔好時，大家OT完唔會同老闆傾OT錢一樣。雪糕，還要是朱古力，配合下面涼粉之類配料很不錯，但味道跟西瓜不太配，而且賣相實在......咦？後來聽講可以轉第二款雪糕？吓？點解冇人提我？
自加汁可免滿瀉的設計有花心思，下面的水果和配料份量都幾足，最重要，是店家留下了很厚瓜肉，沒有刮乾刮淨，吃完內容後，可以慢慢享受刮西瓜樂趣，西瓜狂一定滿足。由個瓜而言，我都好滿足，之但係，匙羹可唔可以唔短棍？個盎都唔算淺，玩探羹取肉，好易一手都係，如果有長棍一定超過癮。
又雪糕，又西瓜，生凍到極致，合晒我噪底人口味，無敵唔無敵唔係重點，有得食西瓜盅先係。
見佢西瓜盅都OK，追加一個法式焦糖燉蛋，定價26元，附上四件生果。
熱食，質感很好，焦糖有少許微苦，燉蛋夠creamy之餘，又不會太甜，配合起來相當不錯！好味道！叫做招牌菜，果然有兩下散手，是款推薦得出手的甜品！雖然個焦糖燉蛋正正，但生果就比較孤寒，不過搭單性質，就算了。
此店出品看得上有下過心思設計，亦有水準，如改善一下服務和配套，如提提人客雪糕可以轉款，配套餐具可以合用點，給多張紙巾之類，就更加無得頂！
暗食熱評指數：
地雷度： 3%(食物) | 8%(加配套)
電車度： 5天
糧尾度： 3天
暗食熱評綜合指數：91%
店名：明師傅甜品
地址： 荃灣海壩街87號荃好景大廈地下
Openrice：明師傅甜品
沒有留言:
張貼留言